ياسيتى ارحمى اهلى عايز اذاااااااااااااكر

السلام عليك ورحمة الله وبركاته
الله أكبر الله أكبر..أذان الظهر..

-يارب.. يارب بحق ده الآدان تنجح يا حماده يابن ابنى وأشوفك دكتور أد الدنيا
-ياستى بس أنا فى تجارة
-وماله يابنى هو يكتر على ربنا...... ده ربنا قادر على كل شئ
-ياستى ونعم بالله بس اللى بيطلع دكتور لازم يكون فى كلية الطب مش التجارة

-ياللا تجارة تجارة ..ومالها التجارة ..دى حتى التجارة شطارة..ده الله يرحمه جدك كان تاجر فى الوكالة أد الدنيا

-ياستى التجارة اللى فى الوكالة حاجة واللى فى الكلية حاجة تانية
-ع العموم شد حيلك أنته وانا أخلى جدك يخدك معاه الوكاله عشان تتدردح وتتودك فى السوق

-جدى إيه اللى هايخدنى معاه .....ده جدى مات من زمان ياستى
-يامصيبتى عبد الواحد مات..ياحبيبى ياأخويا..مكنش يومك ياسبعى
-ياستى ده مات من تلاتين سنة

-تلتين سنه..ده العمر بيجرى ياولاد تصدق ولا حسيت بيهم....ياللا أهو غار فى داهيه....قطع وقطعت سيرته..ده كان بخل الدنيا فيه..أن ما عمره دخل عليه ببطيخة ولاكيس جوافة

-ياستى حرااام عليكى عايز أذاكر بقى
-يوه..وأنا ماسكاك ياوله..ذاكر ...ذاكرعشان ربنا يكرمك وتنجح وتاخد الدبلون
-ياستى دبلون إيه..أسمه البكالوريوس
-أنته بتضحك عليه ياوله..أسمه الدبلون الواد ابن فايزة جدع زيك كده فى مدرسة التجارة وخد الدبلون

-خلاص دبلوم دبلوم ياستى ..سيبينى بقى عشان أذاكر

-ذاكر ..ذاكر ياأخويا ذاكر... تعرف ياواد ..ندرن عليا يوم ماتنجح لأكون رايحه خاطبالك عبير بت رئيسه....دى ايه ياواد.. أدب- وأخلاق..وعلام كمان

-ياستى عبير دى معاها أعدادية

-وماله يابنى ...الراجل مايعبهوش إلا جيبه
-راجل ...راجل مين ياستى...عبير دى بنت
-عبير ...عبير مين ياوله..أنته بتعرف بنات من ورانا
-لا إله إلا الله....أبوس رجلك ياستى أرحمينى بقه

-طب ذاكر....ذاكر جتك نيله وأنته طالع براوى كده زى أمك....قطعت وقطعت سيرتها...أنامش عارفه أبوك كان أجوزها على إيه..حكم...قال لبس البوصة تبقى عروسة..بس والله لأكون مبوظه الخطوبة دى ومجوزاه أنيسة بنت أختى

-ياستى خطوبة إيه..أبويا مجوز أمى من خمسة وعشرين سنة ..وبعدين أنيسة دى بنت أخوك مش بنت أختك ..وأساسا إنتى ملكيش إخوات بنات

-صحيح ياوله ..أنته عندك حق أنا مليش إخوات بنات..أصلى أناأمى ماكنتش بتخلف صبيان

-حرام .... ستى ماتطلعى البلكونة شويه ...ده الهوا حلو بره ..

-لأياخويا....فى جدع كده حليوه وشعره مسبسب فى البلكونه اللى فى الوش بيقعد يعاكسنى
-خلاص روحى المطبخ ...أهو زمان أمى خلصت الرز ..
-رز...رزإيه يابنى....هوأنا ليه سنان للرز...أناهطلع البلكونه أحسن ..
-طب أبقى خلى بالك م الهوى ياستى
-هوى لما يلطشك ..

لاتعليق

تسلمي يا قمر

اكيد الناس دي من طنطا

هههههههههههههههههههههههههههههههههههههههههههههههههههههههههههههههههههههههههههههه جميله اوي اوي يا ستي يا اميرة روحي المطبخ هتلاقي امي عملت الرز ولا اقولك انتي ملكيش سنان للرز روحي البلاكونه بس خالي بالك من ابن الجيران المسبسب ههههههههههههههههههههههههههههههههههههههههههههههههههههههههههههههههههههههههههه

ميرسى طنطاوى على مرورك

تسلمى يانوسه ياقمر على الرد الجميل

ههههههههههههههههههههههه اطاطه وعوكل

ميرسى ياقمر ع الرد الجميل