حبك علي فين موديني ؟

حبك علي فين موّديني؟
تركت مالي وحالي ومحتالي
ومشيت هايم علي وجهي
وسيبت أحبابي وخلاّني
وفارقت ناسي وأوطاني
وما سمعت كلام عقلي
ومشيت ورا اللي قالو قلبي
مشيت ورا حبك
اللي من الأهوال ورّاني
وكان أملي إني أقابلك
وأسعد بلقياك تاني
أحكي لك علي اللي جواني
واللي شايله قلبي لقلبك
واللي سطرته في حبك
وأحكي ليكي علي اللي جرا لي
وهجرت الدنيا عشان خاطرك
مشيت مشاوير طوالي
ورحت بلاد ما كانت علي بالي
أسأل ناسها الطيبين عنك
عن اللي كانوا قريبين منك
سألت اللي كنتي زمان عنهم تحكيلي
وللعرافين رحت وللكف شافولي
وقرأوا الفنجان والودع كمان وروني
ركبت مراكب وموج البحر حطني وشالني
وفي جزر بعيدة قوي سابني
لقيت فيها قبايل وناس تانيه سألوني
أيه اللي لحد هنا جابك
ومين اللي علينا دلك
وليه يابننا سايب بلادك
هو إنت يابني موش خايف علي شبابك
قلت لهم بدور علي حبيبتي
اللي لفوق في الهوا شالتني
وعلي كفوف الحب حملتني
وكل ألوان الغرام ورّتني
ولما حلقت فوق السحاب سابتني
وقالت لو انت بتحبني بجد حصّلني
وياريت ياناس تساعدوني
وعلي طريق الحب اللي مشيت فيه تدلوني
ردوا عليا وقالوا مفيش مانع إننا نساعدك
وعلي ربنا التكال والمكتوب هتلاقيه قدامك
لكن علي حبها فين دليلك
وعلي عشقها ورينا أمارات ميولك
وإن كان حقيقي حبها مالكك
وساكن هواها جواك وفي قلبك
واجب علينا إننا نساعدك
وإن كانت حبيبتك في أي مكان نجيبها لك
رديت وقلت شوفوا بقي حالي
شوفوا عنيا شوفوا دموعي
والدليل خدوا أعصروا مناديلي
وآدي صورتها مرسومة علي كفي
وكمان حبيبتي ما بتفارق خيالي
وبقيت أنا شبح بعد ما كانوا بيصفوا جمالي
وبعد ماكنت عايش بين أهلي
أصبحت لكل الطرق سالك
وعرضت نفسي لألوان المهالك
وآدي أنا تايه وقالوا الناس إبكي علي حالك
وكمان يقولوا إنسي وبص قدامك
واسمع كلام العقل وخليه دليلك
وابعد بقي عن أي كلام يتقال لك
ولو سمعت بعد كده كلام قلبك
تتوه وبرده موش هتلاقي حبيبتك
ردوا الطيبين أهل الجزيرة وقالوا خليك
وعيش بيننا ورزقك يا ابن الحلال هيجيلك
وبإذن الله هترجع مجبور لبلادك
وحبيبتك معاك إيدها في إيدك

لاتكن سلبيا لاتقرا وترحل انما اكون فخور لو رايت ردك على الموضوع