كــلام X كــلام

الناس بقت بتقول أي كلام .. كلام في كلام وكله في الكنافة .. لاحد بيفكر هو بيقول إيه وليه ولمين ، ولاحد بيهتم بالكلام اللي بيسمعه ، بياخده من هنا وبيخرجه من هنا أو حتى يصدقه مش هاتفرق ، واللي ماعندوش كلام بيجيب أي كلام سمعه أو بيألفه وبيقوله والناس عندها إستعداد تصدق أي حاجة .. ماحدش عنده إستعداد للتفكير ولا قدرة على فلترة الكلام .. ودايما الكلام على لسان الآخرين .. أنا سمعت .. بيقولولك .. كاتبين على النت .. واحد قريبي شغال فين بيقول إنه شافهم بيعملوا إيه .. وكلام .. كلام

مثال لكده إعلان ميلودي الأخير .. وسواق التاكسي وهو بيرغي وعمال يزيد ويعيد عن مطار الأنفاق .. أو إعلان صيانة هيونداي والميكانيكي ماسك بتاعة مدلدله في إيده بتنقط زيت وبيقوله شوف .. الكارتير بيجيب كهرباء ، أي كلام في أي كلام ياعم الحاج ، شوف الدقاق بتاع مجلة ميكي وهو بيتكلم في الفضائيات أي هلفطة وأي حاجة وغلوشة وخلاص ، ومن الشارع خد بأه كلام .. اللي يقولك دول إخترعوا موبايل ديسبوزابول تستعمله مرة واحدة وترميه ، واللي يقولك أنا أعرف واحد عضته قطة وبينزل في الشارع بالليل يهوهو ، والعروسة اللعبة اللي الست دخلت المطبخ لقت العروسة بتطبخ مسقعة فصرخت فالعروسة دلقت عليها الزيت .. وهي المسقعة بتحتاج زيت ، وحكاية الدبوس اللي موجود على كرسي السينما اللي فيه إيدز ، ولا البخاخة اللي بترسم صلبان على حجاب البنات ، وكل حاجة بتجيب السرطان وشوية وتطلع الحاجة دي بتعالج السرطان ، واللي يفتي ويقول إن اللي يحمل قربة فساء وهو متوضأ يفسد وضوئه .. مش عارف أصلا هايملوا القربة إزاي ، والكفرة اللي عاملين شعار كوكاكولا بطريقة لمّا تحطه قدام المرايا وتقراه بالعكس ماعرفش يطلع ايه

لماذا إفتقدنا القدرة على التحليل والتدقيق ؟ لماذا أصبح لدينا القدرة على تصديق أي شيئ نسمعه ؟ لماذا أصبحنا نتناقل أي كلام وكأنه حقائق موثقة ؟ لماذا نحاول أن نصرح بأرائنا في أمور نجهلها ؟

هل هو الجهل ..؟ هل هو الفقر والبؤس ..؟ هل هو اليأس ..؟ هل هو فقدان الثقة ..؟ هل هو زيادة المتناقضات في المجتمع ؟ هل هي ثقافة الفهلوة ؟


أم هو كل ذلك ؟