............البنت لابن عمها والولد لبنت عمه..............

سلام عليكم ورحمة الله وبركاته

في عرف كده في بعض الأسر إنه البنت مش تتجوز غير إبن عمها

والولد مش يتجوز غير بنت عمه

البعض بيعتبرها قاعدة أساسية

وبنات عيلتنا مايخرجوش بره

ابن عمها أولى بيها وهي أولى بإبن عمها

الحكاية دي بتسبب مشاكل كتير في بعض البيوت

تلاقي أم الولد بتكلم أم البنت

والبت للواد وزيتنا فدقيقنا والعيال لبعض

ويسلام بقى لو الولد مرتاح للبنت

الحكاية بتشعلل في دماغهم اكتر واكتر

وتلاقي الأم بتزن على البنت

هااا إيه رأيك في إبن عمك ؟؟

ماله يا ماما ؟؟

كويس وطيب ويبقى إبن عمك

طب وانا اعمله ايه يعني ياماما ؟؟

تعبر البنت عن عدم رغبتها فى الجوازة دي

يتقفل الموضوع

وكمان يومين

ها ياحبيبتي فكرتي ؟؟

في ايه يا ماما ؟؟

في إبن عمك



وتفضل الحكاية تلف وتدور لحد حلول أقرب الأجلين

اما الموت

واما الزواج من ابن العم

ولو عكسنا الوضع

البنت متعقله بإبن عمها

وهو في الطراوة

بنت عمك اولى بيك يابني

لا يا حجه مش هتجوزها

يابني يهديك يرضيك

مش هتجوزها يا ماما

وبردك الموضوع بيلف يلف ويرجعوله تاني

لما الولد يكون رافض غير لو البنت رافضه

لما يكون الرفض منه هو

الموضوع نوعا ما بيتقفل ويخلص

اما لو منها هي

ليه ومش ليه وعشان ايه وفي ايه ؟؟

ويلفوا يلفوا والموضوع يتفتح تاني وتالت وعاشر

المشكله انه الأهل مش متخيلين نقطة القبول بين الطرفين

ممكن واحد فيهم عنده قبول ناحية الطرف التاني

في الحالتين دول الطرفين يتصرفوا ازاى ؟؟

الولد والبنت

في الحالتين ؟؟

المشكله كمان انه بيكون في نوع من الضغط على البنت او الولد

ويسلام لو الضغط على البنت من ابن عمها كمان

في الحالات دي التصرف يكون ازاى ؟؟

الموضوع ده ألفت عليه قصص وحكايات وروايات

واكتب واعبر واطلع في افكار لتطفيش إبن العم او بنت العم

بلاقيها مسدودة من جميع النواحي

يعني مثلا في بنت تقول مش هتجوزه

ومع اول واحد يتقدم هقبله وزي مايكون

هنلاقي في الحالة دي انه الاهل هيطلعوا فيه القطط الفطسانه

عشان في الاخر تتجوز إبن عمها

ونفس الوضع مع الولد
هيوقفوله الجوازة عشان يتجوز بنت عمه



ها بقى ؟؟

لو مش توصلنا لإقناع الأهل

او نخليهم يتخلوا عن الفكره دي

ايه الحل ؟؟

اولا ميرسى ليك يارينو على الموضوع اما بالنسبه للموضوع فا من وجهه نظرى انا
ان لو البنت مش عايزه ابن عمها تبقى تروح وتصرحه انها مش عايزه وان هو مجرد ابن عم ليها مش اكتر والعكس لو الولد هو اللى مش عايزها

ميرسى ياقمر مره تانيه